Astara rayon İcra Hakimiyyətinin başçısı Qəzənfər Ağayev Asxanakəran kənd inzibati ərazi dairəsi üzrə nümayəndəliyin Anbuba kəndində səyyar qəbul-görüş keçirib. Bu haqda məlumatı Cenublu.az bu gün, 17 iyun tarixində verir.
Görüşdə rayonun inzibati orqanlarının, idarə və müəssisələrin rəhbərləri iştirak ediblər.
Sakinlər Anbuba kənd ibtidai məktəbinə şəhid Kənan Hacıyevin adının verilməsinə, kəndə gələn yolun asfaltlanmasına, ünvanlı sosial yardımın təyin edilməsinə, torpaq tələbi bəndinin ləğv edilməsinə, əhaliyə odun yanacağının tədarükü üçün şəraitin yaradılmasına, Motalayataq kənd Ailə sağlamlıq mərkəzinin dərman preparatları ilə təmin edilməsinə, internet şəbəkəsinin çəkilməsinə, Şıxımpeştə kəndində ibtidai məktəbin yaradılmasına və yolun təmirinə köməklik göstərilməsini xahiş ediblər.
Ərazidən keçən Taxtanakəran-Toradi avtomobil yolu asfaltlanandan sonra əsas problemin həllini tapdığını qeyd edən icra başçısı Asxanakəran, Motalayataq, Anbuba, Azaru kəndlərində müasir tipli yeni məktəb binalarının, Motalayataq kəndində səhiyyə müəssisəsinin tikilərək əhalinin istifadəsinə verilməsini ölkəmizin böyük iqtisadi dayaqlara malik olması ilə izah edib.
Sonda səmərəli görüşə görə sakinlərə minnətdarlıq edən icra başçısı qaldırılan məsələlərin həlli ilə əlaqədar aidiyyəti üzrə tapşırıqlar verib.
Qeyd edək ki, Anbuba kəndində 300 nəfərdən artıq əhali yaşayır. Əhalinin əsas məşğuliyyəti əkinçilik, heyvandarlıq və arıçılıqdır. Kənd rayon mərkəzindən 40 kilometr aralıda, dağlıq ərazidə yerləşir.
