Lənkəran Ağır Cinayətlər Məhkəməsində Neftçalada qayınatası – şəhid atası Hüseyn Əhmədovu və həyat yoldaşı Əfsanə Bağırovanı öldürməyə cəhd etməkdə təqsirləndirilən Fərid Bağırovun məhkəmə ifadəsi açıqlanıb.
Hakim Neymət Məmmədovun sədrliyi ilə keçirilən prosesdə Fərid Bağırov Cinayət Məcəlləsinin 29, 120.1-ci maddəsi ilə özünü təqsirli bilmədiyini söyləyib. O, əməlini qəsdən adam öldürməyə cəhd deyil, xəsarət yetirmə kimi qiymətləndirilməsini istəyib.
Təqsirləndirilən şəxsin sözlərinə görə, qayınatası ilə münasibətləri hələ subay vaxtlarından pozulub. Əfsanə Bağırova ilə ailə qurduqdan sonra isə gərginlik daha da artıb. O bildirib ki, həyat yoldaşını onun razılığı ilə qaçıraraq evlənib və iki övladı var.
Fərid Bağırov qeyd edib ki, Hüseyn Əhmədovun oğlu Vətən müharibəsində şəhid olduqdan sonra dövlət işinə düzəlib və sosial yardım məsələsi ilə bağlı ondan 350 manat tələb edib. “Sosial yardım düzəldiləndən sonra aramızda mübahisə yarandı”, – deyə o bildirib.
İfadəyə əsasən, 2025-ci il iyulun 19-da övladlarının qayınatasıgilə aparıldığını öyrənən Bağırov əsəbiləşib. Bir neçə gün ailəsinin geri qaytarılmasını xahiş etsə də, təhqirlərlə qarşılanıb.
Hadisə günü parkda Hüseyn Əhmədovla qarşılaşan Fərid Bağırov onu arxadan vurduğunu, öldürmək niyyətinin olmadığını deyib. Daha sonra həyat yoldaşına da xəsarət yetirdiyini etiraf edib.
Məhkəmənin hökmü ilə Fərid Bağırov 9 il azadlıqdan məhrum edilib.
