Ermənilər tərəfindən əsir götürülən Azərbaycan Ordusunun hərbi qulluqçusu, Lənkəran sakini Hüseyn Axundovun anası danışıb. Bu haqda məlumatı Cenublu.az bu gün, 24 iyun tarixində Modern.az-a istinadən verir.
“Oğluma 20 il həbs verilməsini eşidəndə özümdən gedib yerə yıxıldım. Bir anda dünya başıma fırlandı, şoka düşdüm”, - deyə əsir anası Şəlalə Axundova bildirib.
“Hüseynə 20 il iş verildiyini televiziyadan eşitdim. O xəbəri eşidən kimi həyətə çıxdım. Bir anda yerə yıxıldım. Dizlərimin ağrısından oturub-dura bilmirəm, gəzə bilmirəm. Ayaqlarım qan içində idi. İndi də xəbərlərə baxıram. Gözüm oğlumu axtarır, onu görmək, səsini eşitmək istəyirəm. Gecə-gündüz dua edirəm ki, Hüseyn əsirlikdən azad olunsun. O, evə qayıtmayana qədər mən yaşaya bilmərəm”, - Şəlalə Axundova söyləyib.
O, yenidən Beynəlxalq Qırmızı Xaç Komitəsi ilə əlaqə saxladığını deyib.
“Həbslə bağlı mənə heç nə demədilər. Xəbərlərə baxanda bildim. Televizorun qarşısında oturub gözləyirdim. Birdən Hüseynin adını eşitdim. 20 il həbs deyiləndə dəli oldum. Bu nə işdir bizim başımıza gəlib?! Qırmızı Xaç Komitəsi ilə danışmışam, onlarda da hələ heç bir xəbər yoxdur. İyulun 13-də onlara baş çəkəcəklər. İnşallah övladım həmin vaxta kimi azad olunar. Bizim yazdığımız məktubun gələn ay görüşdə onlara veriləcəyini dedilər. Ümidimizi itirməmişik. İnanıram ki, dövlətimiz Hüseynlə Aqşini erməni əsirliyindən azad edəcək”, - Şəlalə Axundova əlavə edib.
Xatırladaq ki, iyunun 21-də qondarma qətl işində ittiham olunan Hüseyn Axundova 20 il həbs cəzası kəsilib.
