Salam Emil bəy. İlk öncə sizi “O səs Azərbaycan” müsabiqəsinin finalçısı olmanız münasibətilə təbrik edirik. Arzu edirik ki, final mərhələsində də bütün Cənubluları öz qələbənizlə sevindirəsiniz. Pərəstişkarlarınızı maraqlandıran bəzi sualları sizə ünvanlandırmaq istəyirik.
Emil bəy, özünüz haqda məlumat verərdiniz.
Mən, Emil Tağıyev 20 aprel 1994-cü ildə Astara rayonunun Kijəbə qəsəbəsində dünyaya gəlmişəm. Orta təhsilimi Astara rayonu Tüləgüvan kənd məktəbində almışam. 2007-2009-cu illərdə musiqi məktəbində xanəndəlik üzrə oxumuşam, 2009-2013-cü illərdə Bakı Mədəni-Maarif texnikumunda təhsilimi davam etdirmişəm. Gülyaz Məmmədovanın tələbəsi olmuşam. 2015-dən Ojakəran kənd klubunda müdir işləyirəm.
Niyə məhz “O səs Azərbaycan” müsabiqəsinə qatıldınız?
Yarışmada seçim turlarının başlandığı haqda mənə Mədəniyyət Mərkəzindən məlumat verdilər və mən də seçimlərə qatıldım. Uğurla seçimdən keçərək görmədən dönmələr mərhələsinə vəsiqə qazandım. Artıq finaldayam. Tamaşaçıların dəstəyinə böyük ehtiyacım var. Əsasən cənubun dəstəyini gözləyirəm. Cənubun səsini Azərbaycanın səsi etmək sizin əlinizdədir.
Brilliant Dadaşovanın tələbəsi olmaq necə hissdir?
Brilliant Dadaşovanın komandasında olmaq və bu qədər irəliləmək çox qürurvericidir.
Müsiqiyə olan həvəsiniz ailənizdən gəlir yoxsa başqa səbəblər var?
Musiqiyə həvəsim uşaqlıqdan var və hələ də davam edir. Anamın və atamın da musiqi istedadı var. Dayılarım isə peşəkar musiqiçidirlər.
Gələcəklə bağlı planlarınız nələrdir?
İlk növbədə yarışmada 1-ci olmaq. İnşallah dəstəyinizlə olaram və xalqımızın sevimli sənətçisinə çevrilərəm.
Biz də Cenublu.az olaraq Emil Tağıyevə finalda birincilik sevincini dadmağı arzulayırıq!
