Masallı rayon Xırmandalı kənd uşaq bağçasının binası acınacaqlı vəziyyətdədir. Bu haqda məlumatı Cenublu.az bu gün, 31 may tarixində Xezerxeber.az-a istinadən verir.
1981-ci ildə tikilib istifadəyə verilən bağçanın binası iki korpusdan ibarət olub. Korpuslardan biri qəzalı vəziyyətdə olduğuna görə fəaliyyəti dayandırılıb.
Hazırda fəaliyyətdə olan korpusda pəncərə və qapılar qırıq vəziyyətdədir.
Bağçanın ən böyük problemlərindən biri də içməli su ilə bağlıdır. Müəllimlər su maşınlarından həftə ərzində 3 dəfə 600 litr su alıb, xüsusi çənlərə doldururlar. Bu da onlara ay ərzində təxminən 100 manata başa gəlir.
Aidiyyəti orqanlar bağçanın problemlərindən xəbərdardırlar. Gələcəkdə bağçanın su problemini aradan qaldırmaq üçün subartezian quyuların qazılması nəzərdə tutulub.
Qeyd edək ki, hazırda bağçada iki qrup fəaliyyət göstərir.
