Masallnın Musaküçə kənd məktəbi tədris üçün yararsız vəziyyətdədir. Bu haqda məlumatı Cenublu.az bu gün, 28 mart tarixində Space TV-yə istinadən verir.
Şəhid Fahyəddin Hancanovun adını daşıyan Masallı rayon Musaküçə kənd tam orta məktəbinin binası hər an uçmaq təhlükəsi ilə üz-üzədir. Məktəbin acınacaqlı vəziyyəti isə dərs prosesinə mənfi təsir edir.
Bina qəzalı olduğundan 34 sinif otağından 8-nin qapısı şagirdlərin üzünə bağlanıb. Bu səbəbdən də sakinlər övladlarını məktəbə göndərməyə ehtiyat edirlər.
Məsələ ilə bağlı Lənkəran-Astara Regional Təhsil İdarəsinin Masallı rayonu üzrə təhsil sektorunun müdiri Qoşqar Hətəmov bildirib ki, bu barədə Lənkəran-Astara Regional Təhsil İdarəsi tərəfindən aidiyyəti üzrə Elm və Təhsil Nazirliyinə məlumat verilib.
“Növbəti mərhələdə dövlət proqramına uyğun olaraq həmin məktəb üçün yeni məktəb binasının tikilməsi nəzərdə tutulub”, - deyə o əlavə edib.
Qeyd edək ki, Masallı rayon Musaküçə kənd tam orta məktəbinin binası 1957-ci ildə tikilib və hazırda təhsil ocağında 37 müəllim işləyir.
