Masallıda tanınmış yazıçı-publisist Nurəddin Ədiloğlunun anadan olmasının 65 illiyi qeyd olunub. Bu haqda məlumatı Cenublu.az bu gün, 10 iyun tarixində verir.
Yubiley tədbirində Masallı Rayon İcra Hakimiyyətinin başçısı Araz Əhmədov, rayon rəsmiləri, elm, mədəniyyət xadimləri, ictimaiyyət və media nümayəndələri iştirak ediblər.
Azərbaycan Yazıçılar Birliyinin üzvü, şair Ağacəfər Həsənli tədbiri açıq elan etdikdən sonra yubilyarın həyat və yaradıcılığından bəhs edən videoçarx izlənilib.
Nurəddin Ədiloğlunu vətənpərvər yazar, müasir oxucunu düşündürə bilən bacarıqlı söz sahibi kimi xarakterizə edən Masallı Rayon İcra Hakimiyyətinin başçısı Araz Əhmədov yubilyarı təbrik edib, ona uzun ömür, cansağlığı, yaradıcılığında yeni-yeni uğurlar arzulayıb.
İstedadlı qələm sahibi, sözünün və xarakterinin bütövlüyü ilə seçilən Nurəddin Ədiloğlunun jurnalistika və ədəbiyyat sahəsindəki fəaliyyətini yüksək qiymətləndirən Azərbaycan Yazıçılar Birliyi Lənkəran bölməsinin sədri Qafar Cəfərli, Lənkəran Dövlət Universitetinin professoru Yədulla Ağazadə, yazıçı və şairlərdən Bilal Alarlı, Meyxoş Abdulla, Mahir Cavadlı, Balayar Sadiq, jurnalistlərdən İlqar Əhmədov, Zahir Əmənov, şərqşünas Əli Rzazadə və başqaları yubilyarın çoxşaxəli yaradıcılıq uğurlarından danışıb, xatirələrini bölüşüblər.
Tədbir iştirakçıları N.Ədiloğlunu təbrik edərək ona xoş arzular diləyib, hədiyyələr təqdim ediblər.
