Masallı fermerləri sahələrində yaranan çətinlikdən narazıdırlar. Bu haqda bu gün, 31 may tarixində Cenublu.az Qafqazinfo.az-a istinadən xəbər verir.
Qızılağac kənd sakini, fermer Anar Abbasovun dediyinə görə, o, problemlə əlaqədar olaraq dəfələrlə Meliorasiya və Su Təsərrüfatı Açıq Səhmdar Cəmiyyətinin rayon Suvarma İdarəsinə müraciət etsə də, səsinin eşidilmədiyini bildirib:
"Damcılama qaydasında 6 hektar xiyar əkmişəm, amma onu suvara bilmirəm. Xiyar elə tərəvəzdir ki, ən azı iki gündən bir suvarılmalıdır. Əkində 17 insanın əməyi keçib, məhsul yığımında isə 65-70 insan işləyəcək. İndiki şəraitdə böyük iş yeridir. Buna baxmayaraq, aidiyyəti qurumlar bizim şikayəti dinləmir, hər şeyin üstündən keçirlər, sanki mən heç onlara şikayət etməmişəm. Xiyar sahəsi suvarılmır. Aidiyyəti qurumlar bizə yardım etməkdən imtina edirlər. Bizim sahəyə su gələn arxdan 1000 metr qabaqda bir fermerin yonca sahəsi var. Onun ot sahəsinin suvarılması üçün Ekologiya və Təbbi Sərvətlər Naziriyi tərəfindən qadağan olunmuş böyük həcmli su nasosu quraşdırılıb. Dəfələrlə Meliorasiya və Su Təsərrüfatı Açıq Səhmdar Cəmiyyətinin rayon suvarma idarəsinə müraciət etmişəm. Amma orada məni eşidən yoxdur”.
Fermer bildirib ki, ot sahəsinə qeyri-qanuni qoyulan nasos oradan götürülməsə, 70 ailə ac qalacaq:
"Dedim ki, gəlin, yoxlayın, belə olmaz. Burada 70 nəfər işləyir, atasız, xəstə, imkansız, hətta gündəlik Rayon İcra Hakimiyyətinin binasının qarşısında iş istəyənləri belə işlə təmin etmişəm. Arxamız, dayağımız, pulumuz yoxdur deyə bizi eşitmirlər. Həmin fermerin ərazisinə qoyulan nasosu oradan təcili götürmək lazımdır. Mən bu barədə şöbəyə deyəndə qurumdan mənə dedilər ki, nasosun sahibi onun üçün icazə alıb. Bu nasos 10 nəfərin suyunu götürür”.
Qafqazinfo.az əməkdaşları məsələ ilə bağlı şikayətçinin ittiham etdiyi Ekologiya və Təbii Sərvətlər Naziriyi ilə əlaqə saxlayıblar. Nazirliyin nümayəndəsi İradə İbrahimova problemin araşdırılacağını deyib. Sorğu, həmçinin Meliorasiya və Su Təsərrüfatı Açıq Səhmdar Cəmiyyətinə də ünvanlanıb. Sözügedən qurumdan bildiriblər ki, məsələ araşdırılacaq.
