Masallı rayon Mərkəzi Kitabxanasında tanınmış Azərbaycan rejissoru Tofiq Kazımovun anadan olmasının 100 illiyi münasibətilə tədbir keçirilib. Bu haqda məlumatı Cenublu.az bu gün, 5 iyun tarixində verir.
Tədbirdə çıxış edən kitabxananın əməkdaşı Şəmsurə Nəsirova qeyd edib ki, milli teatr tariximizdə özünəməxsus yeri olan görkəmli rejissor, Xalq artisti, Dövlət Mükafatı laureatı Tofiq Kazımovun anadan olmasının 100 ili tamam olur. Tofiq Kazımovun tükənməz yaradıcılıq enerjisi nəticəsində Azərbaycan milli teatr prosesində yeni üslub yaranıb.
Sonra kitabxananın digər əməkdaşı Günay Xəlilova vurğulayıb ki, Azərbaycanda lirik-psixoloji teatr məktəbinin yaradıcısı Tofiq Kazımov ali rejissorluq təhsilini Moskvada alıb. Tofiq Kazımovun Akademik Milli Dram Teatrında baş rejissor kimi səhnələşdirdiyi “Sən həmişə mənimləsən”, ”Yalan”, “Ölülər”, “Sənsiz”, “Hamlet” kimi dolğun tamaşalar Azərbaycan səhnəsini rövnəqləndirib. Tofiq Kazımov yaradıcılığı dövründə bir neçə teatrda və kinostudiyada fəaliyyət göstərib. O, uzun illər teatr institutunda aktyor və rejissor sənətindən dərs deyib. ”Çağırış”, ”İşıqlı yollarda”, “Şəfəq”, ”Qoçaq Polad” və digər pyeslərin müəllifidir. Mətbuatda teatr sənətinə aid resenziya və məqalələrlə çıxış edib.
Qeyd edək ki, Tofiq Kazımov 2 avqust 1980-ci ildə dünyasını dəyişib. O, Fəxri xiyabanda dəfn edilib.
