Masallıda təcrübə üçün qarpız sahəsi salınıb. Bu haqda məlumatı Cenublu.az bu gün, 2 iyun tarixində verir.
Rayonun Şərəfə kənd sakini Rafət Abbasov bu il yenilik edərək ümumilikdə 6 hektara yaxın torpaq sahəsinin 3 hektarında Türkiyədən gətirilmiş Mirsini və Bonta qarpız toxumlarını əkib. Fermer deyir ki, mövsümdə qarpıza tələbat olduğundan adətən Sabirabad və Şirvandan gətirilən qarpızlar Masallı bazarında satılırdı. İlk dəfə olaraq Şərəfə kəndində təcrübə əsasında açıq sahədə damlama üsulu ilə qarpız toxumları əkilib. Xaricdən gətirilmiş bu toxumun bir ədədi 10 qəpiyə başa gəlib. Bu sort hektara 60-70 ton məhsul verə bilər. Gəlirli sahə olduğundan tələbat daha çoxdur.
Sahənin digər 2 hektara yaxın hissəsində isə pomidor, xiyar, qarğıdalı əkilib. Bu şitillər elit toxumlardır. Hər hektar 80 ton pomidor, 30 ton xiyar məhsulu verə bilər. Bu il yaxşı məhsul əldə edilərsə, fermer gələcəkdə bu sahəni 10 hektardan çox etmək istəyir. Hazırda sahədə 25-30 fəhlə çalışır.
