Masallıda şərti azadlığa buraxılmış şəxsin sevgilisini döyməsi ilə bağlı hadisə baş verib.
Belə ki, 1990-cı il təvəllüdlü, oğurluğa görə məhkum olunmuş Ceyhun Məmmədov 2 il 4 ay cəza çəkəndən sonra azadlığa buraxılıb və yenidən rayona qayıdıb. O, Günel adlı qadınla münasibət qurub və onu Masallıda yerləşən kafelərdən birinə işə düzəldib. Ceyhun hər gün axşam onu işdən götürməyə gedirdi.
Bir neçə gün əvvəl Ceyhun kafeyə gələndə Güneli sərxoş vəziyyətdə görüb. Qadının müştərilərlə birlikdə spirtli içki qəbul etdiyi məlum olub. O, Günelə irad bildirəndə qadın onu təhqir edərək ayrılmaq istədiyini deyib.
Cütlük kafenin çıxışında piyada evə gedərkən mübahisə yenidən qızışıb. Günelin təhqirlərini davam etdirməsi Ceyhunu əsəbiləşdirib və o, qadını döyərək yerə yıxıb, başını asfalta vurub.
Polis müdaxilə edərək Ceyhunu saxlayıb. Hadisə ilə bağlı cinayət işi açılıb və o, həbs edilib. Lakin Masallı Rayon Məhkəməsində tərəflərin barışması səbəbilə cinayət işi xitam edilib və Ceyhun azadlığa buraxılıb.
Qeyd edək ki, adlar şərtidir.
