Lənkəran Ağır Cinayətlər Məhkəməsində mənimsəmə və digər maddələrlə ittiham olunan Habil Məmmədovun (şərti) məhkəmə istintaqı yekunlaşıb. Bu haqda məlumatı Cenublu.az bu gün, 3 iyul tarixində Pravda.az-a istinadən verir.
Hakim Əli Əliyevin sədrliyi ilə keçirilən prosesdə hökm oxunub. Qərara əsasən, H. Məmmədov 7 il müddətinə azadlıqdan məhrum edilib. Hökmdən narazı qalan məhkum apellyasiya şikayəti, dövlət ittihamçısı isə apellyasiya protesti verib.
Şirvan Apellyasiya Məhkəməsi apellyasiya şikayətini qismən təmin edib, birinci instansiya məhkəməsinin hökmünü dəyişib, cəzanı 6 ilə endirib.
Habil Məmmədov 1 sentyabr 2016-cı ildən 14 iyun 2020-ci il tarixinədək Masallı rayon T. Bayraməlibəyov adına 2 saylı Yeddioymaq kənd məktəbinin direktoru vəzifəsində işləyib. İttihama görə, o, bu müddətdə öz qulluq mövqeyindən istifadə edərək ona etibar edilmiş özgə əmlakını külli miqdarda ziyan vurmaqla mənimsəmə və israf etmə yolu ilə təkrarən və bir qrup şəxs halında talayıb. Xidməti vəzifələrinin icrası ilə əlaqədar özü üçün qanunsuz üstünlük əldə etmək məqsədilə öz qulluq səlahiyyətlərindən qulluq mənafeyinə qəsdən zidd olaraq istifadə edərək dövlətin qanunla qorunan mənafeyinə mühüm zərər vurmaqla vəzifə səlahiyyətlərindən sui-istifadə edib və rəsmi sənədlərə tamah niyyəti ilə bilə-bilə yalan məlumatları daxil edərək təkrarən vəzifə saxtakarlığı edib.
O, 82.838 manat pulu mənimsəyərək ələ keçirib.
Habil Məmmədov barəsində Cinayət Məcəlləsinin 179.3.2, 308.1 və 313-cü maddələri ilə ittiham irəli sürülüb.
