Masallıda şəhid övladları üçün “Bilimdən Zəfərə” layihəsi keçirilib. Bu haqda məlumatı Cenublu.az bu gün, 9 may tarixində verir.
Ümummilli lider Heydər Əliyevin və Türkiyə Cümhuriyyətinin 100 illiyinə həsr olunmuş layihə “YAŞAT” Fondunun, “ASAN xidmət”in, “İnnovasiyalar Mərkəzi”nin, “Bilim Bakı” Mərkəzinin birgə təşkilatçılığı, Masallı Rayon İcra Hakimiyyətinin və “ASAN Könüllüləri” Təşkilatının dəstəyi ilə keçirilib.
Məqsəd uşaqların elmə, innovasiyaya və texnologiyaya marağını artırmaq, elmi hadisələrin təcrübədə necə işlədiyini müşahidə etmələrinə imkan yaratmaqdır. Eləcə də onların istirahət günlərinin səmərəli təşkili və dostluq əlaqələrinin möhkəmləndirilməsi əsas hədəflərdir.
Şəhidlərimizin 6-14 yaş aralığındakı övladlarını əhatə edən layihə çərçivəsində iştirakçılara riyaziyyat, dizayn, təbiət elmləri, texnologiya, astronomiya sahəsində müxtəlif təlimlər, ustad dərsləri keçirilib, proseslərin vizual izahı üçün müşahidələr və təcrübələr aparılıb. Həmçinin maarifləndirici, intellektual oyunlar reallaşdırılıb, “Bilim şou” nümayiş etdirilib.
Tədbir müddətində uşaq, vətənpərvərlik, Azərbaycan-Türkiyə qardaşlığı mövzularında müxtəlif musiqilər və şüarlar səsləndirilib, tamaşa nümayiş etdirilib.
Region əhalisi üçün “İnnovasiyalar Mərkəzi” tərəfindən ulu öndərin 100 illiyinə həsr olunmuş müsabiqələr təşkil olunub.
Sonda iştirakçılara təşəkkürnamələr verilib. “OBA” marketlər şəbəkəsi tərəfindən həm iştirakçılara, həm də müsabiqə qaliblərinə hədiyyələr təqdim olunub.
Qeyd edək ki, tədbirin baş sponsoru “PAŞA Holding”, sponsorları “OBA” marketlər şəbəkəsi və “Şaurma N1”-dir. Media dəstəyini “ASAN Radio” həyata keçirir.
