Masallıda “Azərbaycan” jurnalının 100 illiyi ilə əlaqədar Masallı yazarları ilə görüş keçirilib. Bu haqda məlumatı Cenublu.az bu gün, 12 iyun tarixində verir.
Masallı rayon Mərkəzi Kitabxanasında keçirilən tədbirdə “Göy Qurşağı” ədəbi məclisinin üzvləri və kitabxana əməkdaşları iştirak ediblər.
Tədbirdə ilk çıxış edən kitabxananın direktor əvəzi Zamin Məmmədov kitab məbədi olan Mərkəzi Kitabxanada hər zaman olduğu kimi, ədəbi məclisin tədbirlərinə ev sahibliyi etməyə hazır olduqlarını bildirib.
Ədəbi məclisin həmsədri, şair Xanəli Talış bildirib ki, mədəniyyət müəssisələrində məclisin yığıncaqlarının keçirilməsi rayonun mədəni həyatında böyük canlanmaya zəmin yaradır.
Sonra yazıçı Aleq Məmmədov çıxışında vurğulayıb ki, milli mətbuatımızın bənzərsiz örnəklərindən biri olan “Azərbaycan” jurnalı təsis olunduğu vaxtdan bəri ədəbiyyatın təbliğində və istedadlı yazarların üzə çıxarılmasında aparıcı rol oynayıb.
Şair Allahverdi Bayrami öz çıxışında qeyd edib ki, “Azərbaycan” jurnalı fəaliyyəti boyunca çətin və keşməkeşli mərhələlərdən keçərək, müasir dövrümüzədək öz mövcudluğunu qoruyub saxlaya bilib.
“Talisman” qəzetinin baş redaktoru Rafiq Məmməd gənc yaşlarında “Azərbaycan” jurnalında şeirlərinin çap olunmasının onun sonrakı yaradıcılığına böyük stimul verdiyini diqqətə çatdırıb.
Tədbirdə çıxış edənlərdən yazıçı-publisist Xodaşirin Cəbiyev, yazıçı Nazim Qərib, şair Əlimərdan İbrahimov və Məmmədağa Dadaşov “Azərbaycan” jurnalının fəaliyyəti və ədəbi mühitdə baş verən yeniliklər haqqında düşüncələrini bölüşüblər.
Tarix-Diyarşünaslıq Muzeyinin direktoru Əntiqə Tağıyeva muzeyin ilk qurucusu olan atası Rəhim Tağıyevin yazılarının “Azərbaycan” jurnalında çap olunduğunu, jurnalın nüsxələrinin indiyə qədər çoxlu sayda fərdi ev kitabxanasında qiymətli vəsait kimi saxlandığını bildirib.
Tədbirin gedişində ədəbi məclisin üzvləri - Nazim Qərib, Qədiməli Eloğlu, Ədalət İsayev, Şirzad Ağayev və Bahadur Şıxlaroğlu öz yaradıcılıqlarının məhsulu olan hekayə və şeirlər söyləyiblər.
