Masallı rayonunda 1964-cü il təvəllüdlü Mahmud mübahisə zamanı həyat yoldaşı Saraya (adlar şərtidir – red.) xəsarət yetirib.
Demokrat.az xəbər verir ki, hadisə 2024-cü il dekabrın 31-də Masallı rayonunun kəndində baş verib.
Mahmud yaşadığı evdə arvadı Sara ilə aralarında baş vermiş mübahisə zamanı bıçaqla onu vurub.
Hadisəni törədən Mahmudun barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Mahmud ona elan olunmuş ittiham üzrə özünü təqsirli bilib.
O, ifadəsində göstərib ki, ilin son günü mağazadan ərzaqları gec alıb gətirdiyi üçün arvadı axşam yeməyini vaxtında hazırlaya bilməyəcəyini bildirib:
“Buna görə də aramızda mübahisə baş verdi. Həmin vaxt Sara quyudan su çəkməyimi istədi. Lakin ac olduğum üçün çörək yedikdən sonra su gətirəcəyimi dedim. Sara ünvanıma nalayiq ifadələr işlətdiyi üçün əsəbiləşərək mətbəx bıçağını götürdüm və Saranın sağ əlindən bir dəfə vurdum. Sonra gedərək quyudan su çəkərək onun əl-üzünü yudum”.
Bu cinayət işinə Masallı Rayon Məhkəməsində baxılıb.
Məhkəmə təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alıb.
Bu səbəbdən Mahmudun barəsində cinayət təqibinə xitam verilib.
O, cinayət məsuliyyətindən azad edilib.
