Masallı rayon Mədəniyyət Evində IX-XI siniflərə dərs deyən müəllimlər üçün ixtisas seçimində mentorların hazırlanması ilə bağlı “İxtisas seçimində mentorluq” forumu keçirilib. Bu haqda məlumatı Cenublu.az bu gün, 14 iyul tarixində Lənkəran-Astara Regional Təhsil İdarəsinə istinadən verir.
Forumda Masallı RİH ictimai siyasi və humanitar məsələləri şöbəsinin müdiri, Lənkəran-Astara Regional Təhsil İdarəsinin müdiri, Azərbaycan Gənc Müəllimlər Assosiasiyasının sədri, Masallı Rayon Təhsil Sektorunun müdiri, Təhsil Tələbə Krediti Fondu İdarə Heyətinin sədr müavini, Dövlət Məşğulluq Agentliyinin Mərkəzi Karyera filialının nümayəndələri, “PsixoSən” onlayn psixoloq, özünüinkişaf şirkətinin təmsilçiləri və 300-ə yaxın müəllim iştirak ediblər.
Forumda ixtisas seçiminin hansı meyarlara əsasən edilməsi, ixtisas qruplarına daxil olan seçimlər, karyera planlaması, təhsil və karyera istiqamətində psixoloji vəziyyətlə bağlı maarifləndirmə haqqında danışılıb.
Qeyd edək ki, forum Lənkəran-Astara Regional Təhsil İdarəsi və Azərbaycan Gənc Müəllimlər Asssosiasiyasının təşkilatçılığı, Dövlət Məşğulluq Agentliyinin Mərkəzi Karyera filialı və Təhsil Tələbə Krediti Fondunun tərəfdaşlığı ilə baş tutub.
