Masallıda 1 İyun – Uşaqların Beynəlxalq Müdafiəsi Günü münasibətilə silsilə tədbirlər təşkil edilib. Bu haqda məlumatı Cenublu.az bu gün, 2 iyun tarixində verir.
Masallı rayon Heydər Əliyev Mərkəzi tərəfindən uşaqların əyləncəsinə rəng qatmaq üçün Masallı rayon Heydər Əliyev Mərkəzinin rəsm dərnəyinin müəllimi Lalə Nəzərova uşaqlara feysart üslubunda ecazkar obrazlar yaradıb. Tədbirin sonunda uşaqlar üçün Mərkəzin 3D kinozalında “Maşa və Ayı” cizgi filmi nümayiş olunub.
Masallı Tarix -Diyarşünaslıq Muzeyi və Masallı Dövlət Rəsm Qalereyasının əməkdaşları Şəhər 1 saylı uşaq və körpələr evini ziyarət edərək uşaqlarla əyləncəli oyunlar oynayıb, rəqs edib, onlara hədiyyələr verərək balaca fidanları şənləndiriblər.
Masallı rayon Mərkəzi Kitabxanasında “Uşaqlar dünyanın sevincidir” adlı tədbir keçirilib. Tədbirdə İntiqam Əsgərli adına şəhər 3 saylı orta məktəbin IV sinif şagirdləri öz bacarıqlarını nümayiş etdirərək, “Lalələr” mahnısının sədaları altında rəqs ediblər. 2 saylı orta məktəbin şagirdləri ulu öndər Heydər Əliyevə həsr olunmuş şeirlər söyləyiblər. 3 saylı uşaq bağçası - körpələr evindən gələn balacalar “Azərbaycan” mahnısının müşayiəti ilə rəqs edib, əyləniblər. Sonra uşaqlar birlikdə “Biz Heydər nəvələriyik” mahnısını ifa ediblər. Tədbirin sonunda uşaqlar birlikdə xatirə şəkli çəkdiriblər, onlara müxtəlif hədiyyələr təqdim olunub.
Masallı Rayon İcra Hakimiyyətinin başçısı Araz Əhmədov, aparatının əməkdaşları və digər qurumların nümayəndələri rayonun əksər bağçalarına baş çəkərək balaca fidanları təbrik edib, onlara hədiyyələr təqdim ediblər.
