Masallı rayonu, Boradigah qəsəbəsinin bir qrup müəllimi və sakinləri Azərbaycan Rəqəmsal İnkişaf və Nəqliyyat naziri Rəşad Nəbiyevə internet problemi ilə bağlı müraciət ediblər. Bu haqda məlumatı Cenublu.az bu gün, 7 iyun tarixində Bizimyol.info-ya istinadən verir.
Belə ki, qəsəbə sakinlərinin nazir Rəşad Nəbiyevə etdikləri müraciətdə deyilir: “Hörmətli nazir, artıq xeyli müddətdir ki, Boradigah qəsəbəsinin internet təminatında ciddi problemlər yaşanır. Xətlərin köhnə olması səbəbindən tez-tez kəsilmələr baş verir ki, bu həm ciddi problemə, həm də haqlı narazılığa səbəb olur.
Son günlər hava şəraiti ilə əlaqədar qəsəbədə yüzlərlə abonentin telefonu və interneti kəsilib. Boradigahda iki məktəb, bir xəstəxana fəaliyyət göstərir. Xeyli məktəbli onlayn hazırlıqdan geri qalır. Bundan əlavə qəsəbənin yüzlərlə sakini işləri ilə əlaqəli ya qəsəbə, ya da ölkə xaricində yaşayır ki, internetdəki kəsilmələr onların ailələri ilə əlaqə saxlamasına ciddi problemlər yaradır.
Cənab nazir, bildiyimiz qədər keyfiyyətli internet imkanı verən “GPON” sistemi qəsəbəmizin yaxınlığınadək gətirilib.
Sizdən xahiş edirik, qəsəbəmizdə də analoji sistemin tətbiqinin sürətləndirilməsi ilə bağlı göstəriş versiniz”.
Müraciəti Əlövsət Hüseynov, Akif Cavadov, Ədalət Əhmədov, Məmməd Məmmədov, Vasif Məmmədov, Vaqif Şərifov, Böyükağa Zeynalov, Yasər Teymurov, Elçin Əhmədov və s. olmaqla ümumilikdə 40 nəfər qəsəbə sakini imzalayıb.
