Maştağa qəsəbəsində yerləşən Respublika Psixiatriya Xəstəxanasında pasiyentin xəsarət alması iddia edilir.
Teleqraf.аz xəbər verir ki, Masallı rayon sakini Telman Abdulhüseynov ailə üzvləri tərəfindən demensiya diaqnozu ilə xəstəxanaya gətirilib. O, noyabrın 29-da müəssisəyə yerləşdirilib.
Dünən isə xəstə naməlum şəraitdə xəsarət alıb. T.Abdulhüseynovun oğlu bildirir ki, atasının aqressiv davranışları olmayıb. Onun sözlərinə görə, xəsarətlər xəstəxana əməkdaşları tərəfindən döyülmə nəticəsində yaranıb.
Xəstəxananın şöbə müdiri Xanım Hümmətova ittihamın əsasız olduğunu deyib. Onun sözlərinə görə, pasiyent döyülməyib, yıxılaraq xəsarət alıb.
Şikayət əsasında Sabunçu Rayon Polis İdarəsinin 14-cü Polis Şöbəsinin əməkdaşları xəstəxanaya cəlb olunub.
Pasiyentin xəsarətlərinin səbəblərini müəyyən etmək üçün müvafiq tibbi ekspertiza təyin edilib.
