Masallı rayonunun Bədəlan kəndindən olan səhiyyə eksperti Nicat Xəlilov Azərbaycan Prezidenti yanında Ali Attestasiya Komissiyasının qərarı ilə əczaçılıq üzrə fəlsəfə doktoru elmi dərəcəsinə layiq görülüb.
Cenublu.az xəbər verir ki, elmi dərəcə ona “Azərbaycanda icbari tibbi sığorta sistemində dərman təchizatının öyrənilməsi” mövzusunda apardığı tədqiqat işinə görə təqdim edilib.
Nicat Qədiməli oğlu Xəlilov 24 iyul 1978-ci ildə Masallı şəhərində anadan olub. O, 1985–1995-ci illərdə Masallı rayonunun Bədəlan kənd tam orta məktəbində təhsil alıb. 1996-cı ildə Azərbaycan Tibb Universitetinin Əczaçılıq fakültəsinə qəbul olunaraq 2001-ci ildə ali təhsilini başa vurub.
2011–2013-cü illərdə Bakı Dövlət Universitetində biokimya ixtisası üzrə magistratura pilləsində təhsil alan Nicat Xəlilov müxtəlif illərdə Tarif (Qiymət) Şurasının Katibliyində, Milli Məclisin Əmək və sosial siyasət komitəsində, həmçinin bir sıra əczaçılıq şirkətləri və klinikaların idarə edilməsində çalışıb.
Hazırda Nicat Xəlilov DNK İstanbul Hospitalında tibbi direktor vəzifəsində fəaliyyət göstərir.
