Masallı rayon İcra Hakimiyyətinin başçısı Şahin Məmmədov rayonun Yeyənkənd kəndi ərazisində vətəndaşların səyyar görüş-qəbulunu keçirib. Bu haqda məlumatı Cenublu.az bu gün, 14 iyul tarixində Masallı rayon İcra Hakimiyyətinə istinadən verir.
Rayonun idarə, müəssisə və digər xidmət təşkilatlarının rəhbərləri, həmçinin kənd sakinlərinin iştirak etdiyi qəbul-görüşdə icra başçısı əvvəlcə ərazinin iqtisadi göstəriciləri barədə məlumat verib.
Sakinlər isə, öz növbəsində, Xəlfələr kəndinin qazlaşdırılması, qəbiristanlığa gedən yolun asfaltlanması, vətəndaşın pay torpağının olmaması, Yeyənkənd ərazisində elektrik xətlərinin bərpası, yararsız olan elektrik və rabitə dirəklərinin yenisi ilə əvəz olunması, Yeyənkənd kəndi ərazisində işıqların tez-tez yanıb-sönməsi, kənddə oğurluq hadisələri, marketlərdə süni qiymət artımı, gənc yazıçının yeni kitabının Masallı şəhər Gənclər Evində təqdimatı və s. məsələlər barədə müraciətlər ediblər.
Şahin Məmmədov qaldırılan məsələlərin həlli istiqamətində müvafiq qurumlara tapşırıqlar verib, əksər məsələlər yerindəcə həll olunub, digərləri nəzarətə götürülüb.
[caption id="attachment_19807" align="alignnone" width="336"]
Masallı rayon İcra Hakimiyyəti[/caption]
