Masallı rayon İcra Hakimiyyətinin başçısı Şahin Məmmədov Yunanıstanın Katerini şəhərində Avropa çempionu adını qazanan Zəfər Cəlal oğlu Əliyevlə görüşüb. Bu haqda məlumatı Cenublu.az bu gün, 15 iyul tarixində Masallı rayon İcra Hakimiyyətinə istinadən verir.
Görüş zamanı icra başçısı dövlətimizin idmana və idmançılara göstərdiyi diqqətdən və qayğıdan danışıb. Daha sonra çimərlik güləşi üzrə Yunanıstanın Katerini şəhərində keçirilmiş Avropa çempionatında rekord nəticəyə imza atan Zəfər Əliyevi təbrik edərək, onun uğuruna bütün ölkənin sevindiyini bildirib. Gənc idmançı isə, öz növbəsində, gələcək planlarından danışıb və ona göstərilən diqqətə görə icra başçısına və ölkə rəhbərliyinə öz minnətdarlığını bildirib.
Qeyd edək ki, 19 yaşlı Zəfər Əliyev əslən Masallının Dəmirçi kəndindəndir. O, 2010-cu ildə Dəmirçi kənd məktəbinin 1-ci sinfinə gedib, 2021-ci ildə isə Bədəlan kənd tam orta məktəbini bitirib. Hazırda tələbədir, ikinci kursda təhsil alır. O, Masallı rayon Gənclər və İdman idarəsinin nəzdində fəaliyyət göstərən UGİM-in idmançısıdır. Məşqçisi Təhmasib İsayevdir.
