“Masallı Gənclər Evi” sosial xidmət müəssisəsinin kollektivi “Qəhrəmanlarımızı Tanıdaq” layihəsi çərçivəsində Vətən müharibəsi qazisi Əmrah Vahid oğlu Əhədovu ziyarət ediblər. Bu haqda məlumatı Cenublu.az bu gün, 15 iyul tarixində Masallı rayon İcra Hakimiyyətinə istinadən verir.
Ziyarət zamanı qazimizin keçdiyi şərəfli döyüş yolundan söhbət açılıb, qayğıları dinlənilib.
Qeyd edək ki, Əmrah Vahid oğlu Əhədov 24 mart 2002-ci ildə Masallı rayonunun Yeni Zuvand kəndində anadan olub. 2019-cu ildə kənd tam orta məktəbini bitirib. 2020-ci ilin aprel ayında çağırışçı kimi hərbi xidmətə yollanıb. 7 oktyabr 2021-ci ildə ordu sıralarından tərxis olunub.
Vətən müharibəsi zamanı Qubadlı, Laçın rayonlarının, həmçinin Talış kəndinin və Suqovuşan ərazisinin azadlığı uğrunda gedən döyüşlərdə fəal iştirak edib. Bu döyüşlərin birində sol ayağından ağır yaralanıb.
O, İlham Əliyevin sərəncamına əsasən, “Laçının azad olunmasına görə”, “Qubadlının azad olunmasına görə”, “Suqovuşanın azad olunmasına görə” və “Vətən müharibəsi iştirakçısı” medalları ilə təltif olunub.
