Masallıda biznes fəaliyyəti ilə məşğul olan iş adamı, “Masera” MMC şirkətinin sahibi Mirəkbər Şükürovun ölkədən çıxışına qadağa qoyulub. Bu haqda məlumatı Cenublu.az bu gün, 16 iyul tarixində Qafqazinfo.az-a istinadən xəbər verir.
Belə ki, Bakı Kommersiya Məhkəməsi tərəfindən çıxarılmış qərara əsasən, iş adamı vergi borcunu ödəmədiyi üçün Dövlət Vergi Xidməti tərəfindən onun barəsində məhkəmədə iddia qaldırılıb. Hakim Zeynəb Axundovanın sədrliyi ilə keçirilən prosesdə iddia təmin olunub. M.Şükürovun, sahibi olduğu “Masera” MMC-nin 30 min manatdan çox vergi borcunu ödəmədiyi üçün Azərbaycan sərhədlərindən kənara çıxışı müvəqətti məhdudlaşdırılıb.
Qeyd edək ki, adıçəkilən şirkət Azərbaycanda 2012-ci ildən fəaliyyət göstərir və ölkənin ən böyük soyuducu anbar və istixana komplekslərindən biri kimi tanınır. Şirkətin Masallıda 1,2 min tonluq soyuducu anbar və 2 hektar ərazidə illik 0,7 min ton tərəvəz məhsulları istehsal etmək gücünə malik olan istixana kompleksi var.
