Sosial Xidmətlər Agentliyinin sədri Vüqar Behbudov Vətən müharibəsi şəhidi Vüsal Hadıyevin Masallı şəhərində yaşayan ailəsini ziyarət edib. Bu haqda bu gün, 16 iyul tarixində Cenublu.az Azərtac.az-a istinadən xəbər verir.
Ziyarət zamanı Vüqar Behbudov Vüsal Hadıyevin ailəsinin qayğıları ilə maraqlanıb. O, ailənin bundan sonra da dövlət qayğısı ilə əhatə olunacağını bildirib.
Daha sonra şəhid ailələrinə veriləcək evlərdən danışılıb. O qeyd edib ki, bu ilin sonunadək şəhid ailələrinə və müharibə əlillərinə 1500 mənzilin təqdim olunması nəzərdə tutulub. Onlardan 500 mənzil artıq təqdim edilib. İlin sonunadək isə daha 1000 mənzil və fərdi ev bu kateqoriyadan olan vətəndaşlara təqdim ediləcək. Postmüharibə dövründə 264 müharibə əlilinə avtomobil verilib. İndiyədək həmin kateqoriyadan olan 7450 şəxs avtomobillə təmin olunub.
Vüsal Balarəzi oğlu Hadıyev Ağdərə istiqamətində gedən döyüşlərdə şəhid olub. Ölümündən sonra “Vətən uğrunda”, “Suqovuşanın azad olunmasına görə”, “Cəsur döyüşçü” medalları ilə təltif edilib.
