Yayın gəlişi ilə əlaqədar bölgəmizə yerli və xarici turistlərin axını çoxalır. Bölgədə fəaliyyət göstərən bir çox istirahət mərkəzlərinin fəaliyyəti qənaətbəxş olsa da, bəzən turistlərin şikayət etdikləri də olur.
Redaksiyamıza Bakıdan Lerikə, “Relax” istirahət mərkəzinə üz tutan bir vətəndaşın şikayəti daxil olub.
Vətəndaş bildirib ki, 190 manat müqabilində lüks nömrə bron etsə də, qarşılaşdığı mənzərə gözlədiyi kimi olmayıb:
“Kottecin qapısı bağlanmır, su kranı xarabdır, hamam otağını kif bağlayıb, yataq otağında hörümçək toru var. Otağın pərdəsi sökülüb, ağcaqanadlar üçün nəzərdə tutulan tor isə yoxdur. Ayrıca buranın restoranları haqda danışmaq olar. Düşünürəm ki, bununla bağlı AQTA-ya müraciət etməli olacağam”.
Həmçinin vətəndaş qeyd edib ki, pulunu geri almaq istəyərkən ona bildiriblər ki, pulu verməyəcəklər və o, istədiyi yerə gedib, şikayət edə bilər. Vətəndaş müvafiq qurumlara şikayət etdikdən sonra məbləğ ona geri qaytarılıb.
