Lerik rayonunun Andurma kəndində bulaq ətrafının heyvan peyini ilə çirkləndirilməsi sakinlər arasında ciddi narazılıq yaradıb. Kəndlilər bildirirlər ki, bu vəziyyət həm içməli suya, həm də ümumi sanitariya şəraitinə ciddi təhlükə yaradır.
Cenublu.az -a verilən məlumata görə, əvvəllər yaylaqda maldarlıq edən bəzi şəxslər son dövrdə kənddə yaşamağa başlayıb və təsərrüfatlarında toplanan peyini mütəmadi olaraq bulağın yaxınlığına tökürlər. Yağışlı günlərdə axan sular peyini bulağa doğru apararaq suyu çirkləndirir.
Kənd sakini İbiş Köçəriyev bildirir ki, belə hallarda bulaq suyundan istifadə etmək mümkün olmur.
Kənd bələdiyyəsindən isə deyilir ki, ərazidəki heyvan tullantıları təmizlənsə də, təsərrüfatın bulaqdan yüksəkdə yerləşməsi səbəbindən çirklənmənin qarşısını tam almaq çətindir. Qurumun məlumatına görə, problemin tam həlli üçün təsərrüfatın ərazidən köçürülməsi lazımdır, lakin həmin şəxslərin ahıl olması buna imkan vermir.
Sakinlər aidiyyəti qurumlardan içməli su mənbəyinin qorunması və problemin tam həllini tələb edirlər.
