Lənkəran Dövlət Universitetində (LDU) “Məzun günü” keçirilib. Bu haqda məlumatı Cenublu.az bu gün, 6 iyul tarixində verir.
Universitetin rektoru, professor Natiq İbrahimov tədbir iştirakçılarını salamlayaraq LDU-nu bitirən bütün məzunları təbrik edib, onlara gələcək həyat yollarında uğurlar arzulayıb. Professor Natiq İbrahimov LDU-nun 2022/2023-cü tədris ilində qazandığı uğurlardan söz açarkən universitetin 30 illik yubileyinin təntənə ilə keçirilməsini ilin ən ələmətdar hadisəsi kimi dəyərləndirib. O bildirib ki, LDU-nun fəaliyyəti dövründə ilk dəfə olaraq universitetin 5 əməkdaşı ölkə Prezidenti cənab İlham Əliyev tərəfindən yüksək dövlət təltifləri ilə mükafatlandırılıb.
Natiq İbrahimov təbrik çıxışında qeyd edib ki, bu il LDU-nu bakalavriat səviyyəsində 30 ixtisas üzrə 880 məzun, magistratura səviyyəsində 25 ixtisaslaşma üzrə 145 məzun bitirir.
Lənkəran Şəhər İcra Hakimiyyətinin başçısı Taleh Qaraşov təbrik çıxışında məzunlara xoş arzularını çatdırıb. LDU ilə Lənkəran Şəhər İcra Hakimiyyəti arasında son illərdə yaranan səmərəli əməkdaşlıqdan, birgə keçirilən elmi konfranslardan söz açan Taleh Qaraşov bu ali təhsil ocağının bölgənin sosial-mədəni inkişafındakı böyük rolunu xüsusi vurğulayıb, xarici universitetlərlə səmərəli əməkdaşlığını yüksək dəyərləndirib, beynəlxalq əlaqələrdə yaranan canlanmadan ətraflı söz açaraq rektor Natiq İbrahimova icra hakimiyyəti ilə səmərəli əməkdaşlığa, universitetin həyatında yaratdığı işgüzar, səmimi ab-havaya görə minnətdarlıq bildirib.
Məzun günündə millət vəkili Rüfət Quliyev, Lənkəran-Astara Regional Təhsil İdarəsinin müdiri Elxan Nəcəfov, 9 saylı uşaq bağçasının müdiri Ülkər Nuriyeva, valideyn Elmira Nəzirova, məzun Zəhra Əhədova çıxışlarında məzunlara xoş arzularını çatdırıblar, onlara gələcək həyat yollarında uğurlar arzulayıblar.
Tədbirdə təhsilini uğurla başa vuranlar mükafatlandırılıblar. Bakalavr və magistrlərə diplomlar təqdim edilib. Tələbəlik dövründə ictimai fəallığı ilə seçilən məzunların bir qrupuna Lənkəran Şəhər İcra hakimiyyətinin fəxri fərmanları verilib.
Tədbir Lənkəran Dövlət Universiteti və universitetin nəzdindəki Sosial və Aqrar-Texnoloji Kolleci tələbələrinin birgə hazırladıqları konsert proqramı ilə yekunlaşıb.
