Bu gün Azərbaycanın tanınmış ssenariçi və dramaturqu, əslən Lənkərandan olan Eldəniz Quliyevin doğum günüdür.
Eldəniz Cümşüd oğlu Quliyev 1952-ci ildə aprelin 20-si Lənkəran şəhərində anadan olub. 1974-cü ildə Azərbaycan Dövlət İncəsənət İnstitutunu bitirib. Moskvada ali rejissorluq və ssenariçilər kursunun ssenari bölməsində təhsil alıb. "Mosfilm", M.Qorki adına kinostudiyalarda, Ostankino Televiziya mərkəzində təcrübə keçib. "Azərbaycanfilm" kinostudiyasında redaktor, redaksiya kollegiyasının, bədii şurasının, dövlət film qəbulu komissiyasının üzvü (1981-1987), “Debat” studiyasının baş redaktor müavini (1987-1992), "Azərkinovideo" İstehsalat birliyinin baş redaktoru (1993-1996), ABA televiziya şirkətinin baş redaktoru (1999) vəzifələrində işləyib. 2006-cı ildə Beynəlxalq Sülh Federasiyası tərəfindən “Sülh səfiri” fəxri adına layiq görülüb.
Rus və Azərbaycan dillərində nəşr edilən “Ziyalı-İntelligensiya” qəzetinin təsisçisidir. Hazırda Azərbaycan Ziyalı Hərəkatının sədridir. “Üçatılan”, “Tilsimli dairə”, “Təpəgöz” (Polşa Respublikasında tamaşaya qoyulub),”Mürşid kişi niyə susur?”, “İstək” və s. dram əsərləri Azərbaycan teatrlarında tamaşaya qoyulub. “Ağ yuxu” hekayələr toplusu (1985), “Kölgəsiz adam” hekayə və povestlər kitabı (1998), “Rasim Balayev” (1999) kitabları nəşr olunub.
