Lənkəranın Boladi kəndində gələcəyin Teslası, Faradeyi və Voltası kimi ixtiraçılar yetişir desək, yanılmarıq. 7-ci sinif şagirdləri dünyaca məşhur olan fiziklərin kəşf etdiyi qurğuların kiçik formasını hazırlayırlar. İlk işlərinin uğurlu alındığını görən şagirdlər həvəslənərək daha böyük qurğuları düzəltməyi qarşılarına məqsəd qoyublar.
Lənkəranın Boladi kənd 1 saylı tam orta məktəbinin şagirdləri Taleh Cabbarov və Ravil Həsənov fizika fənninə böyük maraq göstərirlər. Taleh Cabbarov mühəndis olmaq istəyir. O deyir ki, Nikola Teslanın kəşf etdiyi qurğuda elektrik cərəyanını bir neçə sm-dən almaq olursa, onun düzəldəcəyi qurğularda daha uzun məsafədən almaq olacaq. Bunun üçün o, bir neçə dəfə sınaq da keçirib. Bəziləri uğurlu olub, bəziləri isə uğursuz.
Həmyaşıdı Ravil Həsənov isə zəlzələ baş verməzdən əvvəl onun afterşoklarını qeydə alan qurğu üzərində işləyir. Digər işi isə çənlərdə suyun səviyyəsini müəyyən edən cihazdır.
Ravil və Talehə bu işdə dəstək olan fizika fənni tədris edən müəllimləri Seyran Əliyev istedadlı şagirdlərinin bacarığını görüb fərəhlənir.
“Biz dərslərimizdə əzbərçilikdən daha çox layihə əsaslı təlimlərə üstünlük veririk. Adətən evdə mövzuya uyğun qurğular, təcrübələr hazırlayıb şagirdlərə nümayiş etdirirdim. Sonradan artıq bu işi şagirdlərin özünə tapşırırdım. Çünki fizikanı daha dərindən başa düşmək, hiss etmək üçün təcrübələr mütləqdir. Şagirdlərimizin buna böyük marağı var, həvəslə qurğular yaradırlar”, - deyə o bildirib.
Fizika fənnini şagirdlərinə sevdirən Seyran Əliyev əmindir ki, bu uşaqlar düzəltdiyi qurğuları inkişaf etdirərək, daha böyük uğurlara imza atacaq və gələcəkdə tanınmış mühəndis olacaqlar.
