"Zərərli vərdişlərin və narkomaniyanın insanların həyat və sağlamlığına zərərli təsiri" mövzusunda maarifləndirici görüş baş tutub. Bu haqda bu gün, 12 aprel tarixində Cenublu.az Lənkəran şəhər Gənclər və İdman İdarəsinə istinadən xəbər verir.
Tədbirdə Lənkəran Şəhər Gənclər və İdman İdarəsinin nümayəndəsi Yusif Xamiyev, Lənkəran ŞRPŞ-nin şəxsi heyətlə iş üzrə rəis köməkçisi, polis polkovnik-leytenantı Anar Həbibzadə, polis mayoru Fazil Bağırov, polis leytenantı İsmət Fərəcli, Lənkəran rayon Xanbulan kənd tam orta məktəbinin direktoru Mərziyyə Əliyeva, kollecin 100 şagird və bir qrup müəllim heyəti iştirak ediblər.
Görüş zamanı çıxış edən natiqlər dövrümüzün ağır bəlasına çevrilən narkomaniyanın zərərlərindən, insan sağlamlığı üçün təhlükələrindən, eləcə də narkotik vasitələrdən yaranan asılılıqdan, ölkəmizdə narkomanlığa qarşı aparılan mübarizədən, erkən nikah və zərərli vərdişlərin gənclərin sağlamlığına mənfi təsirləri barədə danışıblar. Qeyd edilib ki, narkotik vasitələrdən istifadə edən hər bir şəxs uğurlu gələcəyindən imtina etməklə cəmiyyətdə həmişə geridə qalır və aludəçiliyin, zərərli təsirlərin fəsadlarından qurtula bilmir.
Sonda şagirdləri maraqlandıran suallar cavablandırılıb, mövzu ətrafında müzakirələr aparılıb və tələbələrə zərərli vərdişlərdən uzaq olmaq və idmanla məşğul olmaq tövsiyə edilib.
