Kurqanlar Lənkəranda, əsasən, ovalıq ərazilərdə aşkarlanıb. Təxminən 50 kurqan arasında ən məşhurlarından biri İstisu qəsəbəsindədir. O, Yeddi qardaş adlanır.
Tarixçi İldırım Şükürzadə bildirir ki, bu kurqanlardan rayonun müxtəlif yerlərində var: “Sadəcə İstisu qəsəbəsindəki bu Yeddi qardaş kurqanları digərlərindən fərqli olaraq, sanki bir xətt boyunca yerləşir. Ard-arda müxtəlif həcmli, müxtəlif diametrdə, müxtəlif ölçüdədir”.
Yeddi qardaş kurqanlarının hamısı bir xətt üzrə yerləşir və bu kurqanların əksəriyyətinin diametri 45-50 metrdir, hündürlükləri isə 10-15 metrə qədər çatır. Bu kurqanların diametrlərinin bu qədər böyük olması bunların erkən tunc dövrünə deyil, ehtimallara görə son tunc və erkən dəmir dövrünə aid olduğunu ortaya çıxarır.
Amma həm Yeddi qardaş, həm digər kurqanların tarixi barədə dəqiq məlumatları arxeoloji tədqiqatlar aparmaqla müəyyən etmək mümkündür. Belə tədqiqatlar isə demək olar ki, aparılmayıb.
AMEA Lənkəran Regional Elmi Mərkəzinin aparıcı elmi işçisi Samir Kərimov: “1990-cı illərdə Vilvən kənd ərazisində bir kurqan tədqiq olunub. Həmin kurqan 90-cı illərdə AMEA-nın Arxeologiya və Etnoqrafiya İnstitutu tərəfindən tədqiq olunsa da, arxeoloji baxımdan elə də zəngin material əldə olunmamışdı. Çünki hələ qədim zamanlardan bu kurqan qarət olunubmuş”.
Son illərdə Lənkəran ərazisində daha 10 kurqan aşkar edilib. Biri Darquba kənd ərazisində, digəri Bakı-Astara magistral yolu ilə Lənkəran-İstisu yolunun kəsişməsindədir. Bu günə qədər heç biri dövlət qeytiyyatına alınmayıb. Qeydiyyata alınanlar da ya dağılıb, ya da qarət edilib.
Ümumilikdə Cənub bölgəsində 300-ə qədər kurqan qeydə alınıb. Onların çox az qismi tədqiq olunub.
