Lənkəran rayonu, Havzava kəndinin tibb məntəqəsinin binası yararsız vəziyyətdədir. Bu haqda məlumatı Cenublu.az bu gün, 7 iyul tarixində Space TV-yə istinadən verir.
Binada tibb məntəqəsi ilə yanaşı, həm kənd İcra nümayəndəliyi, həm də bələdiyyə yerləşir.
Məntəqə 23 il əvvəl sakinlərin istifadəsinə verilib. Əvvəllər binada 12 otaq olub. 33 il ərzində baxımsız qalan tikili bərbad vəziyyətə düşüb.
Hal-hazırda məntəqədə çalışanlar iki otaqdan istifadə edir və 3 minə yaxın əhaliyə tibbi xidmət göstərirlər.
Zamin Rzayev, Lənkəran RMX-nin nümayəndəsi: “Sözügedən tibb məntəqəsinə aidiyyəti orqanlar tərəfindən baxış keçirilib, aktlar tərtib olunub, yaxın zamanlarda yenidən inşası nəzərdə tutulub”.
Qeyd edək ki, məntəqənin təkcə bir həkim-terapevti var. Bundan başqa, məntəqədə bir feldşer, 4 tibb bacısı və bir sanitar olmaqla ümumilikdə 7 nəfər işçi çalışır.
