Lənkəranda sərxoş qadının iranlı TIR sürücüsünü qarət etməsi ilə bağlı məhkəmə araşdırması başa çatıb.
Hadisə Ələt–Astara avtomobil yolunun 164-cü kilometrliyində, Lənkəran rayonunun Girdəni kəndi ərazisində qeydə alınıb.
İttiham aktına görə, 52 yaşlı Arifə Məcidova sərxoş vəziyyətdə yol kənarında dayanaraq evinə getmək üçün avtobus gözləyib. Bu zaman ölkələrarası yükdaşıma ilə məşğul olan İran vətəndaşı idarə etdiyi TIR-ı onun yaxınlığında saxlayıb. Sürücünün razılığı ilə qadın avtomobilə əyləşib.
Yol boyu Arifə Məcidova sürücünün pul kisəsini saxladığı yeri görüb. Sürücü avtomobildən düşərək aşağıda iş görən zaman qadın içərisində 900 ABŞ dolları (təxminən 1530 manat) olan pul kisəsini götürüb. Zərərçəkən hadisəni anlayanda Arifə Məcidova oğurluğu inkar edib, avtomobildən düşərək pulu yaxınlıqdakı çəmənlikdə çınqılların arasına atıb və ərazidən uzaqlaşıb.
Bir müddət sonra taksi ilə həmin yerə qayıdan qadın pulu götürmək istəyib. Lakin bu zaman TIR və sürücüsü hələ də ərazidə olub. Zərərçəkən dərhal polisə müraciət edib.
Hadisə nəticəsində Arifə Məcidova saxlanılıb və barəsində cinayət işi açılıb. Lənkəran Rayon Məhkəməsinin qərarı ilə onun barəsində 1 il müddətinə azadlığın məhdudlaşdırılması cəzası təyin edilib.
Qeyd edək ki, ad və soyad şərtidir.
