Lənkəran Mərkəzi Kitabxanasında "Unudulmayanlar" lahiyəsi çərçivəsində AYB-nın üzvü olmuş mərhum şair İltifat Salehin xatirə gecəsi keçirilib. Bu haqda məlumatı Cenublu.az bu gün, 20 may tarixində verir.
Təntənəli mərasimdə rəsmilər, şairin ailə üzvləri, yaxın dostları, tanınmış yazıçı və şairlər, ictimaiyyət nümayəndələri iştirak ediblər.
Tədbirdə AYB Lənkəran bölməsinin sədri Qafar Cəfərli şair İltifat Salehin yaradıcılığından söz açıb. O, unudulmaz şairin Azərbaycan poeziyası üçün əhəmiyyəti və onun ədəbiyyatımızda tutduğu mövqedən danışıb. Q.Cəfərli İltifat Salehin yazdığı şeirlərin oxucularının ürəyində silinməz iz qoyduğunu vurğulayıb.
Sonra çıxış edənlər ölməz şair İltifat Salehlə bağlı xatirələrini bölüşüblər.
Tədbirin bədii hissəsidə Lənkəran şəhər C.Cabbarlı adına 1 nömrəli uşaq musiqi məktəbinin muğam üçlüyü sözləri İltifat Salehin, musiqisi bəstəkar-musiqişunas Zəminə Tariyelqızının "Bu sevgi" mahnısını ifa edib. Həmçinin skripka ifaçısı Müqabil Kamandar, xanəndə Əsəd Məmmədovun ifaları iştirakçılar tərəfindən maraqla qarşılanıb.
Tədbirdə, həmçinin məktəblilərin ifasında şair İltifat Salehin yazdığı şeirlər səsləndirilib.
