Lənkəranda şəhid kapitan Vüsal Quliyevin evində xatirə muzeyi istifadəyə verilib. Bu haqda məlumatı Cenublu.az bu gün, 7 iyun tarixində ARB Cenub-a istinadən verir.
Evdə yaradılan muzey şəhidə aid fotoşəkillər, şəhidin xatirə dəftəri, təltifləri, medalları və hərbi forma ilə bəzədilib.
Qeyd edək ki, Vüsal Quliyev 5 iyun 1985-ci ildə Lənkəran şəhərində anadan olub. Orduda kapitan rütbəsində xidmət edən Vüsal 2020-ci il sentyabrın 27-də Ermənistanın işğal altında olan torpaqlarımızın azad edilməsi üçün başladılan döyüş əməliyyatlarına qatılıb. Qəhrəman zabit Vətən müharibəsinin ilk günündən Suqovuşanın azadlığı uğrunda gedən döyüşlərdə şücaət göstərib. 28 sentyabr 2020-ci ildə elə Suqovuşanda döyüş tapşırığını yerinə yetirərkən qəhrəmancasına şəhadətə ucalıb. Vüsal Quliyev ölümündən sonra "Vətən uğrunda", "Füzulinin azad olunmasına görə", "Qubadlının azad olunmasına görə" medalları və “Şəhadət” ordeni ilə təltif edilib.
Şəhidin həyat yoldaşı Fərqanə Quliyeva: “Bu gün artıq Vüsal Quliyevin cənnətdə qeyd olunan 3-cü mövlududur. Vüsal Quliyevin 38 yaşı olsa da, o, hər zaman bizim üçün 35 yaşlı fədakar bir insandır. Çünki o, bizim qocalmadan ucalan baş tacımızdır, bizim fəxrimizdir. Allah bütün şəhidlərimizə rəhmət eləsin, ruhları şad olsun”.
