Lənkəranda narkotik vasitələrin qanunsuz dövriyyəsi ilə məşğul olan şəxs saxlanılıb. Bu haqda məlumatı Cenublu.az bu gün, 9 may tarixində verir.
Daxili İşlər Nazirliyi Baş Narkotiklərlə Mübarizə İdarəsinin əməkdaşları narkotik vasitələrin qanunsuz dövriyyəsinin qarşısının alınması istiqamətində tədbirlər həyata keçiriblər. Nəticədə Ələt–Astara avtomobil yolunun Lənkəran ərazisindən keçən hissəsində Rövşən Qafarzadə tutulub. Onun üzərində 22 kiloqram tərkibi psixotrop maddələrlə zənginləşdirilmiş marixuana və 1240 ədəd metadon həbi aşkar edilib.
R.Qafarzadə bildirib ki, o, narkotikləri sosial şəbəkələrdə tanış olduğu İran vətəndaşı, Vəlixan adlı şəxsin göstərişi ilə Lənkəran ərazisində əldə edib. O, həmin narkotikləri götürüb deyiləcək yerə qoyaraq, narkokuryerlik müqabilində 3000 manat əldə etməli idi.
Fakt üzrə cinayət işi başlanıb. Araşdırmalar davam etdirilir.
