N.Axundov adına Lənkəran rayonu Boladi kənd 1 nömrəli tam orta məktəbində rayon üzrə müxtəlif məktəblərin şagirdlərinin valideynləri ilə iclas baş tutub. Bu haqda məlumatı Cenublu.az bu gün, 27 aprel tarixində verir.
Görüşdə N.Axundov adına Boladi kənd 1 nömrəli, İ.Mahmudov adına Liman şəhər 1 nömrəli, Boladi kənd 2 nömrəli, V.Həsənov adına Liman şəhər 2 nömrəli, Şirinsu və Qumbaşı kənd tam orta məktəblərinin IX-XI sinif şagirdlərinin valideynləri, Lənkəran rayonu üzrə təhsil sektorunun müdiri Elman Rzayev, Lənkəran Şəhər İcra Hakimiyyətinin İctimai-siyasi və Humanitar Məsələlər üzrə şöbə müdiri Ülviyyə Əliyeva, Lənkəran ŞRPŞ-nin Xidmət üzrə rəis müavini İltifat Yusibov iştirak ediblər.
Valideynlərlə narkomaniya və onun fəsadları, erkən nikah, məktəb-valideyn münasibətləri, şagird davranış qaydaları mövzularında müzakirələr aparılıb. Sonda valideynlərin sualları cavablandırılıb.
Tədbir Lənkəran rayonu üzrə təhsil sektorunun təşkilatçılığı ilə həyata keçirilib.
