Lənkəran şəhər Mədəniyyət Mərkəzində 2025-ci ilin yekunlarına həsr olunmuş “Region gənclərinin və idmançılarının II Həmrəylik Forumu” keçiriləcək.
Cenublu.az xəbər verir ki, tədbir 24 dekabr tarixində saat 11:00-da Lənkəran–Astara Regional Gənclər və İdman İdarəsi tərəfindən təşkil olunacaq.
Forum çərçivəsində il ərzində region gəncləri və idmançılarının əldə etdikləri nailiyyətlərin təqdimatı olacaq, fərqlənən gənclər və idmançılar təltif ediləcəklər. Tədbirdə həmçinin motivasiyaedici çıxışlar, musiqi və rəqs kompozisiyaları da iştirakçılara təqdim olunacaq.
Qeyd edək ki, forumda Lənkəran, Astara, Masallı, Lerik, Yardımlı və Cəlilabad rayonlarından olan rəsmi şəxslər, gənclər, idmançılar, məşqçi-müəllimlər, eləcə də idman və ictimaiyyət nümayəndələrinin iştirakı nəzərdə tutulur.
