Lənkəranda evlərin və torpaqların qiymətində artım müşahidə olunur. Bu haqda məlumatı Cenublu.az bu gün, 4 aprel tarixində Apa TV-yə istinadən verir.
Hazırda mərkəzdə bina evlərinin qiyməti 70 min manatdan 120 min manata kimi dəyişir. Bahalaşma daha çox 2-ci Mikrorayonda və “Raypo” deyilən ərazidə hiss olunur. Birotaqlı mənzil tapmaq isə çox çətindir.
Həyət evlərinə gəlincə, qiymətlər 80-150 min manata və hətta 300-500 min manata kimi dəyişir.
Lənkəranda son illər bağlarını satışa çıxaranların sayı da artıb. Burada torpaqların əsas alıcıları Rusiya və digər ölkələrdə yaşayan azərbaycanlılardır. Lənkərana yaxın olan Digah, Sütəmurdov, Şiləvar, Girdəni kəndlərində torpağın bir sotunun qiyməti 1500 manatdan başlayır. Dəniz kənarındakı torpaqların sotu isə 5000 manatdan başlayır.
Kirayə mənzil bazarında da vəziyyət fərqli deyil. Əvvəlki illər 200-250 manata təklif olunan bina evləri indi 300 manata və yuxarı qiymətlərə kirayələmək mümkündür. Ən yuxarı qiymətlər isə dənizkənarı ərazilərdədir. Burada yerləşən evləri bir günlük kirayələmək üçün 150 manatınızdan keçməlisiniz.
Qeyd edək ki, hazırda Lənkəranda ən bahalı torpaq sahəsi Ələt-Astara magistral yolunun üstündə olan torpaqlardır. Burada torpağın sotununqiyməti 15-20 min manatdan başlayır.
