Lənkəran rayonunun Şovu kəndində bir ailənin beş üzvü zəhərlənib. Bu haqda məlumatı Cenublu.az bu gün, 16 iyun tarixində Report.az-a istinadən verir.
Belə ki, bu gün səhər ailə üzvləri tort yeyiblər. Bir müddət sonra onların səhhətlərində problem yaranıb, özlərini pis hiss ediblər.
Təcili tibbi yardım xidmətinin köməyi ilə ikisi azyaşlı olmaqla ailənin 5 üzvü: 64 yaşlı Ənivəs Əli qızı Babayeva, 40 yaşlı Marifə Adıgözəl qızı Babayeva, 33 yaşlı Zamin Səfaddin oğlu Babayev, 7 yaşlı Xədicə Zamin qızı Babayeva və 5 yaşlı təvəllüdlü Mətləb Zamin oğlu Babayev Lənkəran Rayon Mərkəzi Xəstəxanasına çatdırılıblar.
Onlara ilkin olaraq zəhərlənmə diaqnozu qoyulub və lazımı tibbi yardım göstərilib. İlkin məlumata görə, ailə üzvləri 3 gün əvvəl bişirilən şirniyyatdan istifadə ediblər. Zəhərlənmənin istifadə olunan ərzaq məhsullarının keyfiyyətsiz olması və ya şirniyyatın saxlanmasına düzgün riayət edilməməsi səbəbindən baş verdiyi ehtimal edilir.
Hazırda xəstələrin müalicəsi davam etdirilir.
