Mayın 11-də saat 17:21-də Lənkəranda baş verən maqnitudası 5,3 bal olan zəlzələnin dərinliyi 20 kilometr olduğu üçün ətraf ərazilərdə, hətta Qarabağda 3 baladək hiss olunub. Bunu Azərbaycan Milli Elmlər Akademiyası nəzdində Respublika Seysmoloji Xidmət Mərkəzinin baş direktoru Qurban Yetirmişli jurnalistlərə müsahibəsində deyib.
“Ondan sonra xırda təkanlar olub. Afterşoklardan ən böyüyünün maqnitudası 4,4 bal olub və hiss edilib. Çox güclü, dağıdıcı deyildi. Asta-asta enerji boşalması getdi. Hazırda sakitlikdir”, – deyə o əlavə edib.
“Orta gücdə olan zəlzələ idi. Episentrdə 6 bal olması nəticəsində çay daşları ilə keyfiyyətsiz tikilən bəzi evlərdə çatlar qeydə alınıb”, – deyə Q.Yetirmişli bildirib.
