Lənkəran Regional Perinatal Mərkəzində Ailə Otağının açılış mərasimi keçirilib. Bu haqda məlumatı Cenublu.az bu gün, 8 iyun tarixində verir.
Səhiyyə Nazirliyi İctimai Səhiyyə və İslahatlar Mərkəzinin direktoru Qəhrəman Haqverdiyev, BMT-nin Əhali Fondunun Azərbaycan üzrə nümayəndəsi Fərid Babayev, Milli Məclisin Ailə, Qadın və Uşaq Məsələləri üzrə Komitəsinin sədri Hicran Hüseynova, “Ümidli Gələcək” İctimai Birliyinin rəhbəri Kəmalə Aşumova və digərləri çıxış edərək bildiriblər ki, Lənkəran Regional Perinatal Mərkəzində Ailə Otağının yaradılması bir səhiyyə tədbiri olmaqla yanaşı, həm də cəmiyyətimiz üçün yenilikdir, bu istiqamətdə yeni addımların atılmasına dəstəkdir, ilk növbədə isə analara köməkdir.
Vurğulanıb ki, 2022-ci ildən başlayaraq antenatal qayğının yaxşılaşdırılmasına və ataların uşaqların sağlam böyüməsi və inkişafında iştirakının təşviqi və dəstəklənməsinə töhfə vermək məqsədilə Bakı, Lənkəran və Göyçay şəhərlərində müəyyən olunmuş poliklinikalarda tibb işçiləri və valideynlər üçün antenatal maarifləndirmə guşələrinin yaradılması, maarifləndirici materialların hazırlanması və yayılması, habelə tibb işçiləri üçün antenatal qayğı ilə bağlı təlim kursları təşkil edilib.
Eyni zamanda Bakı, Göyçay və Lənkəran şəhərlərində 500-ə yaxın səhiyyə mütəxəssisi üçün ailə planlaması, antenatal qayğı, perinatal və zahılıq dövrlərində qayğı, yenidoğulmuşlara qayğı mövzularında canlı və virtual təlimlər və əhali üçün maarifləndirici seminarlar təşkil olunub.
Qeyd edək ki, Ailə otağının açılışı Avropa İttifaqı, BMT-nin Əhali Fondu (UNFPA) və BMT-nin Qadınlar üzrə Agentliyinin (UN Women) dəstəyi ilə “Ümidli Gələcək” İctimai Birliyi tərəfindən “Səhiyyə müəssisələrində kişilərin perinatal qayğı və qulluq, habelə məsuliyyətli atalıq üzrə fəaliyyətlərə cəlb edilməsi” layihəsi çərçivəsində Səhiyyə Nazirliyi İctimai Səhiyyə və İslahatlar Mərkəzi (İSİM) və TƏBİB ilə əməkdaşlıqla baş tutub.
