Lənkəran Müalicə və Diaqnostika Mərkəzində bir sıra nöqsanlar müşahidə olunur. Bu haqda məlumatı Cenublu.az bu gün, 20 iyun tarixində Bakupost.az-a istinadən verir.
Şikayətçi bildirib ki, tibb müəssisəsinin birinci mərtəbəsində su kranları sınıb, su yoxdur, ayaqyolu yararsız vəziyyətdədir.
Doğuş üçün xəstəxanaya yerləşdirilmiş pasiyentin sözlərinə görə:
"Yerləşdirildiyim palatada antisanitar vəziyyət hökm sürürdü. Məni palataya qəbul edəndə yataq dəstlərini belə dəyişmədilər. Məcbur qalıb çirkli, məndən əvvəlki pasiyentin yatdığı yatağa gödəkcəmi sərib uzandım. Pəncərələrin qarşısında qarışqalar gəzirdi. Hətta qarışqalar körpəmə də daraşırdılar. Bununla bağlı etdiyim müraciətlərə isə məhəl qoyan yox idi".
Qeyd edilib ki, mərkəzdə hamam işləmədiyi üçün xəstələr yayın istisində əziyyət çəkirlər.
Məsələ ilə bağlı sözügedən səhiyyə ocağının ictimaiyyətlə əlaqə şöbəsindən bildirilib ki, mərkəzdə, həqiqətən də, hamam problemi var:
"Bunu hələ ki həll etmək mümkün olmayıb. Qurban bayramına görə işçilər xəstəxanada azlıq təşkil edirlər. Ona görə palatada müəyyən təmizlik işlərinə ehtiyac yaranıb. Amma bütün bunlar dərhal aradan qaldırılacaq və xəstələrə lazım olan bütün xidmətlər göstəriləcək".
