Lənkəran Şəhər Gənclər və İdman İdarəsi və Lənkəran Regional Mədəniyyət İdarəsinin birgə təşəbbüsü ilə yeniyetmə və gənclərin asudə vaxtlarını səmərəli keçirmələri ilə bağlı kəndlərdə maarifləndirici tədbirlər davam edir. Bu haqda məlumatı Cenublu.az bu gün, 15 iyul tarixində Lənkəran şəhər Gənclər və İdman İdarəsinə istinadən verir.
Lənkəran şəhər Mədəniyyət Mərkəzinin Kənarmeşə kənd Sənətkarlıq Evində baş tutan tədbirdə qeyd olunub ki, gənc nəslin asudə vaxtının səmərəli keçməsi, mədəniyyət və incəsənət sahələri üzrə yeni dərnəklərin təşkili və azyaşlı uşaqların, gənclərin bu dərnəklərə cəlb olunması istiqamətində bir sıra işlər həyata keçirilib. Kəndlərdə idman qurğularının qurulması yeniyetmə və gənclərin mütəmadi olaraq idmanla məşğul olmaları zərərli vərdişlərdən uzaqlaşmasında, həmçinin asudə vaxtlarının səmərəli təşkilində böyük rol oynayır.
Sonda Sənətkarlıq Evinin özfəaliyyət dərnək üzvləri musiqilər, şeirlər səsləndirib və milli rəqslərlə tədbir iştirakçılarını şənləndiriblər.
Xatırladaq ki, yeniyetmə və gənclərin asudə vaxtlarının səmərəli keçirilməsi və zərərli vərdişlərdən uzaq olması ilə bağlı ilk mədəni-maarifləndirici görüş Göyşaban kənd Yaradıcılıq Evində baş tutub.
