Lənkəran İslam Kollecinin diplomları etibarsız sayılacaq. Bu haqda məlumatı Cenublu.az bu gün, 4 iyul tarixində Dini Qurumlarla İş üzrə Dövlət Komitəsinə istinadən verir.
Qurumun Dini təhsil şöbəsinin müdiri, dinşünas Elnarə Kərimova bildirib ki, qanuna əsasən, dini təhsil müəssisələri komitədə dövlət qeydiyyatından keçməklə yanaşı, lisenziya əsasında fəaliyyət göstərməlidir. Tələbə qəbulu isə Dövlət İmtahan Mərkəzi (DİM) tərəfindən aparılmalıdır.
Lakin Qafqaz Müsəlmanları İdarəsinin təsisçisi olduğu və Gənclərə Yardım Fondunun himayəsi altında fəaliyyət göstərən bu kollec lisenziya almayıb. Buna görə də qəbul DİM tərəfindən keçirilmir. Bu da cari ildən həmin kollecə qəbul olan şəxslərin diplomlarının etibarsız hesab ediləcəyi deməkdir. Bununla bağlı həmin kollec rəsmi məlumatlandırılıb.
