Milli Arxiv İdarəsi Xalq artisti Həqiqət Rzayevanın anadan olmasının 115-ci ildönümünə həsr olunmuş virtual sərgi təqdim edib. Bu haqda məlumatı Cenublu.az bu gün, 20 iyul tarixində Azertac-a istinadən verir.
Sərgi S.Mümtaz adına Dövlət Ədəbiyyat və İncəsənət Arxivinin şəxsi fondunda saxlanılan sənədlər əsasında təqdim olunub.
Qeyd edək ki, Həqiqət Rzayeva əslən Lənkəranın Darquba kəndindəndir. O, opera solisti olmaqla bərabər, muğamlarımızın və xalq mahnılarımızın özünəməxsus ifaçısı idi. H.Rzayeva kinematoqrafçılar tərəfindən bir neçə dəfə film çəkilişlərinə dəvət olunmuşdur. Onun kino lentlərində ən yaddaqalan obrazı 1958-ci ildə kinorejissor Həbib İsmayılovun çəkdiyi “Ögey ana” filmində Qəmər xala obrazıdır.
Görkəmli vokal ustasının ölkə mədəniyyəti üçün göstərdiyi xidmətlər dövlət tərəfindən yüksək qiymətləndirilib. O, 1943-cü ildə “Azərbaycan SSR Xalq artisti” fəxri adına layiq görülüb.
