Lənkəran Dövlət Peşə Təhsili Mərkəzində yeni ixtisas üzrə kadrlar hazırlanacaq. Cenublu.az bu barədə 22 iyun tarixində xəbər verir.
Lənkəran Dövlət Dram Teatrının müraciəti əsasında sentyabr ayından etibarən təhsil ocağında İnteryer və eksteryerin bədii tərtibatı ixtisası üzrə 15-20 nəfərdən ibarət qrup fəaliyyətə başlayacaq.
Mərkəzin direktoru Afər Həmidoğlunun sözlərinə görə, hələ fevral ayında Lənkəran Dövlət Dram Teatrının rəhbərliyindən belə bir ixtisasın açılması üçün müraciət ünvanlanıb:
"Bununla bağlı biz də öz növbəmizdə Elm və Təhsil Nazirliyinə yazılı müraciət etdik və müraciətimizə müsbət cavab verildi”.
Teatrın direktor vəzifəsini icra edən İntiqam Hacılı da Lənkəranda yeni ixtisas üzrə mütəxəssislərin hazırlanmasından məmnunluğunu bildirib:
"Müraciətimizə həssas yanaşdıqlarına görə Lənkəran Dövlət Peşə Təhsil Mərkəzinin direktoru Afər müəllimə, Elm və Təhsil Nazirliyinə təşəkkürümüzü bildiririk. Artıq teatrımızla Peşə Təhsil Mərkəzi arasında müqavilə də bağlanılıb. Yəni Peşə Təhsil Mərkəzi həm bizim üçün, həm də bölgənin mədəniyyət müəssisələri üçün yeni kadrlar hazırlaycaq".
Qeyd olunub ki, kadrların hazırlanmasında Lənkəran Dövlət Dram Teatrının rəssamları, rejissorları bilavasitə yaxından iştirak edəcəklər.
