Bu gün, 21 iyul tarixində Lənkəran Dövlət Dram Teatrının rəssamı Adil Əsədlinin ad günüdür.
Adil Əsədli 1954-cü ildə Lənkəranda anadan olub. 1974-1980-ci illərdə Əzim Əzimzadə adına Azərbaycan Dövlət Rəssamlıq Məktəbini fərqlənmə diplomu ilə bitirib. 1993-cü ildə Lənkəranda fərdi sərgisi açılan Adil Əsədli, elə həmin il Rəssamlar İttifaqının Fəxri fərmanına layiq görülür. 40 idən çoxdur ki, böyük sənət uğurları qazanan rəssamın Bakıda və Lənkəranda 8 fərdi sərgisi təşkil olunub, əsərləri 18 xarici ölkədə müxtəlif beynəlxalq sərgiləri bəzəyib.
Lənkəranlı rəssam 800-dən çox rəngkarlıq və 100-dən artıq qrafika əsəri yaradıb. Onun 200-dən çox rəngkarlıq və qrafika əsəri Türkiyə, İran, Ukrayna, Gürcüstan, Rusiya, İngiltərə, Fransa, Polşa, ABŞ, Yaponiya, Çin, İsrail, Özbəkistan və digər ölkələrin vətəndaşlarının şəxsi kolleksiyalarında saxlanılır.
