Lənkəranda 31 Mart - Azərbaycanlıların Soyqırımı Günü münasibətilə anım mərasimi keçirilib. Bu haqda məlumatı Cenublu.az bu gün, 31 mart tarixində Lənkəra rayon İcra Hakimiyyətinə istinadən verir.
Belə ki, Lənkəran Şəhər İcra Hakimiyyətinin başçısı Taleh Qaraşov, icra hakimiyyəti aparatının kollektivi, hüquq-mühafizə orqanlarının, idarə, müəssisələrin rəhbərləri və ictimaiyyətin nümayəndələri Lənkəran şəhərinin mərkəzində soyqırımı qurbanlarının xatirəsinə ucaldılmış abidəni ziyarət ediblər. Abidə önünə tər güllər düzülüb, soyqırımı zamanı günahsız qətlə yetirilən minlərlə azərbaycanlının xatirəsi dərin hüzn və ehtiramla yad olunub.
Qeyd edək ki, Bakı Soveti və daşnak erməni dəstələri 1918-ci ilin 30 mart və 3 aprel tarixləri arasında Bakı şəhərində və Bakı quberniyasının müxtəlif bölgələrində, eləcə də Lənkəran, Şamaxı, Quba, Xaçmaz, Hacıqabul, Salyan, Zəngəzur, Qarabağ, Naxçıvan və digər ərazilərdə azərbaycanlıların soyqırımını törədiblər. Həmçinin kütləvi qətliamlar Lənkəran şəhərində, rayonun Mamusta, Yuxarı Nüvədi, Vilvan, Viravul, Girdəni, Cil, Osakücə, Darquba, Gərmətük, Sütəmurdov və digər kəndlərində törədilib. Lənkəran və ətraf rayonlarda ümumilikdə 40-dək yaşayış məntəqəsi yerləyeksan edilib, 2000-dən çox dinc sakin amansızlıqla qətlə yetirilib.
Soyqırımı qurbanlarının xatirəsinə ucaldılan abidə gün ərzində rayon ictimaiyyəti tərəfindən ziyarət olunur.
